Grup de Recerca en Sociolingüística i Geolingüística : Linguatec IA (ar)

LINGUATEC IA, un projècte entà auançar ena digitalizacion der aragonés, catalan, basc e occitan

Aguest projècte europèu transpirenenc e transfronterèr a metut es bases entà desvolopar coneishença en intelligéncia artificiau aplicabla as lengües damb pòqui recorsi des dus costats des Pirenèus

Cofinançat peth FEDER mejançant POCTEFA e dirigit per Elhuyar (a trauès deth sòn centre d’intellgéncia artificiau Orai), a era tòca d'aplicar naui modèls de lenguatge generatius en aguestes lengües

29 de gèr de 2024.

Eth tractament deth lenguatge ei un poderós estrument entàs comunitats lingüistiques damb pòqui recorsi, qu’ajude a revitalizar era lengua e a promòir-ne eficaçament er emplec. Ei de vitau importància entad aguestes lengües pujar ena ondada dera intelligéncia artificiau, entà non demorar endarrèr. Era qualitat artenhuda en tractament deth lenguatge naturau non ei ara man de totes es lengües, e era collaboracion ei fonamentau entà desvolopar naui recorsi e estruments lingüistics. Cau aumentar er esfòrç en innovacion, en tot invertir ena investigacion en intelligéncia artificiau aplicada ath tractament deth lenguatge naturau.

Era tòca deth projècte europèu LINGUATEC IA (Intelligéncia Artificiau), cofinançat peth Hons Europèu de Desvolopament Regionau a trauès dera convocacion Interreg POCTEFA (còdi EFA 104/01), ei desvolopar coneishença en intelligéncia artificiau sus naui modèls de lenguatge generatius aplicables a lengües damb pòqui recorsi, e era sua utilizacion entà auançar ena digitalizacion der aragonés, catalan, basc e occitan (lengües deth territòri POCTEFA) e en bastiment d'ua infrastructura lingüistica e intelligenta transfronterèra que facilite era comunicacion entre es parlants des diferentes lengües e er accès multilingüe ara informacion.

Eth consòrci d'aguest projècte transfronterèr —dirigit per Elhuyar (a trauès deth sòn centre d’intelligéncia artificiau Orai) e constituït peth Congrès Permanent dera Lengua Occitana, HITZ zentroa (UPV/EHU), Universitat Jean Jaures de Tolosa, Universitat de Perpinhan, IKER-CNRS de Baiona, Govèrn d'Aragon e era Universitat de Lhèida— a establit es bases de trabalh ena sua amassada iniciau celebrada eth 15 de gèr en Usurbil. Eth consòrci ei format per “entitats de naut nivèu que compausen ua comunitat scientifica ath torn des sies lengües des Pirenèus, damb era tòca de recuperar-les e revitalizar-es”, afirme Josu Aztiria, coordinador deth projècte LINGUATEC. Aguest projècte “contribuís ara articulacion sociau e culturau deth territòri transfronterèr, en tot refortir un element clau dera cultura locau, es lengües”, ahig.

En aguest sens, es entitats participaires en projècte trabalhen ja en diferenti encastres restacadi damb eth tractament deth lenguatge, coma ei eth desvolopament de naui algorismes e arquitectures neuronaus adaptadi a situacions de comput e recorsi lingüistics limitadi. Atau madeish, “volem milhorar es sistèmes de transcripcion, traduccion automatica neuronau e sintèsi de votz deth basc, catalan, occitan, aragonés, e es sues variantes dialectaus, que combinen damb eth francés e er espanhòu –soslinhe Aztiria–, e tanben desvolopar ua plataforma lingüistica multilingua de subtitulacion e doblatge automatic”. Ath delà, “auem previst crear ua plataforma o repositòri en linha damb toti es recorsi, tecnologies e aplicacions que desvolopam entàs lengües des Pirenèus”, ahig.

Es entitats que compausen aguest projècte cren qu'eth sòn trabalh serà de grana ajuda “tant entara comunitat de recèrca e professionau que trabalhe en encastre des lengües e era sua digitalizacion, coma entàs entitats publiques e privades que poderàn milhorar es sòns servicis e hèr-les accessibles a diferenti idiòmes”, e son erosi de poder “balhar ara ciutadania recorsi e estruments valables qu’ajuden a comunicar-se mès facilaments en un entorn multilingüe”.

Eth projècte LINGUATEC IA non ei cap un projècte que nèish ara. Se tracte d'un projècte que recuelh eth testimòni de LINGUATEC, projècte prealable cofinançat damb hons POCTEFA, ja finalizat, a on dempús de tres ans de camin, e eth naut nivèu de desvolopament artenhut, es entitats sòcies heren un pas de caractèr estrategic e assolidèren un hilat d’excelléncia en intelligéncia artificiau entath bastiment d'ua infrastructura lingüistica transfronterèra.

MÈS INFORMACION: Alaitz Imaz Tel.: 747 400 121 | komunikazioa@orai.eu

Projècte cofinançat peth Hons Europèu de Desvolopament Regionau (FEDER)